Yaon na kita sa ika-apat na Domingo nin Kwaresma. Nadangog ta sa ebanghelyo ngunyan, an ulay-ulay ni Jesus asin ni Nikodemo.

Enot, sisay si Nikodemo? Sya sarong Pariseo asin myembro kan Sanhedrin. Sya nasambitan sa ebanghelyo na nakikiulay ki Jesus matanga nin banggi tanganing makanood. Sya saro sa nagprotesta tumang sa plano na ipagadan si Jesús. An huring dangog saiya iyo idtong pag-andam kan lana na ilalahid sa gadan na hawak ni Jesús asin pag-andam kan kan saiyang lulubngan.

Si Nikodemo madunong asin may inadalan. Ini an dahilan kun tano ta dawa alanganin na oras, boot ni Jesus na makipag-ulay sa saiya. Bakong gayong maogmang kaulay an mga disipulos. Maluya an pick-up ninda. Dikit sana sa sainda an nakakasurat asin nakakabasa.

Alagad, si Nikodemo masusupgon. Ginagalangan sya kan banwaan, alagad takot syang magladlad kan saiyang pagsunod ki Jesus. Sya nagduduwa-duwa. Takot maggibo nin dakulang desisyon. Mas mahalaga saiya kun ano an sasabihon kan kataraed kisa sa sasabihon ni Jesus. Marhay na materyal kutana. Huli kan saiyang kadunongan, tibaad sya kutana an naging enot na Santo Papa. Alagad, dai sya nagbutwa, dai nagpamidbid, dai nangenotan. An saiyang pakipag-ulay ginibo sa banggi. Habo nyang sya mahiling kan saiyang mga amigo sa aldaw. Dakul an mawawara sa saiya.

Sa dai mahahaloy na panahon, malaog na kita sa Semana Santa. Ipinapagirumdom kita kan pangapudan ni Jesús na maging disipulos nya. Ano man na oras, andam syang makipag-ulay sa sato, maging aldaw, maging banggi.

Bakong arog ki Nikodemo, dai dapat kita matakot na magsunod sa saiya. Dai dapat kita masupog na mag-arog saiya.

Sa pagsunod sa saiya, kaipuhan agihan ta man an pagtios, an buhay nin pagsakripisyo. Pasanon ta man an satong krus nin huli ta sa kasakitan maliligtas an satong mga kalag. Sa mga pagpenitensya maliligtas an kalag kan satong kapwa.